NEC YAWAKARIBISHA WANANCHI OFISINI KUPATA ELIMU YA MPIGA KURA NA UFAFANUZI WA MASWALI YAO.

 Na Deborah Lemmubi - Dodoma.

Tume ya Taifa ya Uchaguzi imetoa wito kwa Wananchi wote kufika katika Ofisi zao zilizopo Mtaa wa Njedengwa Jijini Dodoma ili kuweza kupata Elimu ya mpiga kura sambamba na kupata ufafanuzi juu ya maswali yanayowatatiza.

Wito huu umetolewa na Bi Rose Chilongozi ambaye ni Mkurugenzi Msaidizi Kitengo cha Huduma za Sheria akiwa katika maonesho ya wiki ya utoaji wa Elimu ya Sheria yanayoendelea katika viwanja vya Nyerere Square Jijini yenye kauli mbiu inayosema: Umuhimu wa utatuzi wa migogoro kwa njia ya Usuluhishi,katika kukuza Uchumi Endelevu,Wajibu wa Mahakama na Wadau.

Na kuongeza kuwa,Wananchi wajitokeze pia katika zoezi la uboreshaji Daftari la Mpiga kura ambalo litatangazwa na kuanza siku za hivi karibuni.

"Mimi wito wangu tunawakaribisha wananchi wote katika Ofisi zetu zilizopo Njedengwa,wafike waweze kupata elimu ya mpiga kura na kupata ufafanuzi juu maswali yanayowatatiza wasibaki kujiuliza tu huko pembeni, pia niwaombe wajitokeze katika zoezi la uboreshaji wa daftari la mpira kura mara tutakapo tangaza kuanza kwa zoezi".

Na kuongeza kuwa,kwa wale ambao hawataweza kufika Ofisini kwao wanaweza kupata Elimu na Ufafanuzi kwa kupiga simu au kutuma maswali yao kwa barua pepe na wao wata wapatia majibu kwani wamekuwa wakifanya hivyo pia.

Aidha Bi Rose ameeleza lengo la wao kuwepo katika maonesho haya ya wiki ya sheria kuwa ni kuujulisha Umma kuwa TUME ipo inafanyakazi na imesajiliwa Kisheria.

"Lengo la sisi kuwa hapa katika maonesho haya ni kutaka kuujulisha Umma kuwa TUME ipo,inafanya kazi na Imesajiliwa Kisheria hivyo watu waje kwaajili ya kupata Elimu".

Sambamba na hayo Bi Rose ameainisha shughuli zinazofanywa na TUME kwa kipindi cha kabla ya Uchaguzi,wakati wa Uchaguzi na baada ya Uchaguzi ambapo amesema mojawapo ni Uandaaji wa Bajeji,Marekebisho ya Sheria,Kanuni na Maelekezo,hivyo TUME iko kazini muda wote yani kwa hiyo mizunguko mitatu ya kabla,wakati na baada ya Uchaguzi.

"TUME inafanya shughuli zake kwa mizunguko mitatu yani kabla Uchaguzi,wakati wa Uchaguzi na baada ya Uchaguzi ikiwemo Uandaaji wa Bajeti,Uandaaji wa Kalenda ya Uchaguzi na mpango wa ufuatiliaji,Utoaji wa habari na elimu ya mpiga kura na Uboreshaji wa daftari la kudumu la wapiga kura"

Mbali na hayo yote pia yapo Majukumu ya Tume ya Taifa ya Uchaguzi kwa kuzingatia matakwa ya ibara ya 74(6) na 78 katiba ya Jamhuri ya Muungano wa Tanzania ya mwaka 1977 zikisomwa pamoja na kifungu cha 4C cha Sheria ya Taifa ya Uchaguzi Sura ya 343 na kifungu cha 86A cha Sheria ya Uchaguzi ya Serikali za Mitaa,Sura 292,moja ya Majuku ya Tume ni Kusimamia na kuratibu uandikishaji wa wapiga kura katika Uchaguzi Raisi na Wabunge katika Jamhuri ya Muungano.

KIKWETE ATAKA WANANCHI KUSHIRIKISHWA UTWAAJI ARDHI.

Na Deborah  Lemmubi - Dodoma

Serikali kupitia Wizara ya Ardhi, Nyumba na Maendeleo ya Makazi imewataka Wataalam wa Mipango miji kutambua kuwa zoezi la utwaaji Ardhi ni la ushirikishwaji tofauti na baadhi ya wataalam wanavyofanya bila kushirikisha Wananchi.

Na kuongeza kuwa vitendo hivi havikubaliki na kuitaka bodi ya wataalam wa mipango miji kutoa elimu kwa wataalam hao kuacha tabia hiyo inayochangia kuleta migogoro mikubwa kwa wananchi hususani katika maeneo ya miji ambapo miradi ya kupanga, kupima na kumilikisha ardhi imekuwa ikiendelea.

Maelekezo hayo yametolewa na Naibu Waziri Wizara ya Ardhi Nyumba na Maendeleo ya Makazi Mhe Ridhiwani Kikwete wakati wa uzinduzi wa Bodi mpya ya usajili wa wataalam wa Mipango miji Sambamba na ukabidhi wa vitendea kazi kwa Wajumbe wapya wa Bodi,na kusema kuwa ni vibaya sana kwa wataalam hao kukiuka taratibu za kitaaluma suala linalopekea wanasiasa kuingilia kati ili kutoa maamuzi ambayo yanaweza kuchochea migogoro kwani wanasiasa sio wataalam wa fani hiyo.

Ridhiwani Kikwete pia ameonya tabia ya kutosimamia mipango miji waliyoiweka inasababisha miji kuvurugwa kwani kwasasa kila mahali kuna ujenzi wa vyumba vya maduka au vituo vya mafuta na baa katika makazi ya watu.

‘’Haya ni mambo ambayo Bodi inapaswa kuyasimamia kwani uzinduzi wa Bodi hii ni suala muhimu sana katika mustakabali wa ukuaji wa taaluma ya Mipangomiji, kwani Bodi ya Wakurugenzi pamoja na Menejimenti ya Bodi ndizo pande mbili ambazo zinaungana pamoja katika kuikuza na kuisimamia taaluma ya mipangomiji nchini’’.

Aidha Kikwete ameitaka bodi hiyo kuzingatia uzoefu na weledi wajumbe wa Bodi hiyo walionao katika fani mbalimbali, kushirikiana kikamilifu na Wizara kuendeleza taaluma ya Mipangomiji kwa pamoja na kufikia lengo la kusimamia Wataalam wa Mipangomiji na kampuni za upangaji miji.

‘’Usimamizi wenu utafanya Wataalam na Kampuni za Mipangomiji zifanye kazi kwa weledi na kuzingatia Sheria, Kanuni na taratibu za upangaji miji, kutoa huduma bora, kuweka mazingira ya kuvutia Wataalam wa Mipangomji waliokidhi vigezo vya kusajiliwa ili wasajiliwe, pia kuzalisha fursa zaidi za ajira na kuongeza mchango katika pato la Taifa.’’

Naibu Waziri Kikwete amesema Sekta ya Ardhi ni muhimu sana kwa maendeleo ya Taifa na kwa kila mwananchi akiongeza kuwa Ardhi ni msingi wa kipekee wa maendeleo na ni rasilimali isiyoongezeka.

Akitolea mfano wa Nchi yetu Naibu Waziri Kikwete amesema Tanzania ina eneo lenye ukubwa wa takribani kilometa za mraba 948,132.89, ikijumuisha kilometa za mraba 62,032.89 za maji uku eneo la nchi kavu lina ukubwa wa kilometa za mraba 886,100, ambapo Tanzania bara ni kilometa za mraba 883,600, na Zanzibar ni kilometa za mraba 2,500.

Na kuongeza kuwa kuna ongezeko la watu kutoka watu 43,625,354 Sensa ya watu 2012, hadi kufikia watu 61,741,120 Sensa ya Watu na Makazi 2022 wakati idadi ya watu ikiongezeka, ukubwa wa ardhi bado ni ule ule.

Kwa upande wa mijini Naibu Waziri huyo amesema, matokeo yake yamejidhihirisha kupitia ongezeko la uendelezaji wa miji isiyopangwa na ukuaji wa makazi holela na kuitaka bodi kufanyia kazi changamoto hizi ili zitatuliwe kwa kupanga ardhi mijini na vijijini ili uendelezaji miji ufuate mipango ya matumizi ya ardhi.

Aidha, Naibu Waziri Kikwete ameitaka bodi pamoja na wataalam wa Mipango Miji kubuni mbinu za namna bora ya kuimarisha utendaji kazi wa Wataalam na Kampuni za Upangaji Miji pamoja na kuibua mikakati ya kutatua changamoto zinazoikabili taaluma ya mipangomiji na Sekta ya Ardhi kwa ujumla, hasa utatuzi wa migogoro ya ardhi.

Kwa upande wake Naibu Katibu Mkuu Wizara ya Ardhi Nyumba na Maendeleo ya Makazi  Sheushi Mbuli aliyemwakilisha Katibu Mkuu Wizara hii Dr Allan Kijazi ameitaka Bodi hii mpya kusimamia kwa weledi eneo la maadili kwa kuangalia kwanini wataalamu wanakiuka Maadili ili wajue tatizo na kulishughulikia.

Naye Mwenyekiti mpya wa Bodi hiyo Prof. John Lupala akitoa mwelekeo wa bodi yake amesema Bodi kwa mwaka wa fedha ujao itaanzisha mfumo wa kufuatilia wataalamu wa mipangi miji ili kuweza kuwafuatilia kwa akaribu ili kuwazawadia wanaofanya vizuri na kutoa adhabu kwa wale wanaokiuka taratibu na maadili pia.

Prof. Lupala ameongeza kuwa Mfumo huu pia utawezesha bodi kuona kwa karibu kinachoondelea kwa wataalamu wa mipango miji lakini pia kuhakikisha wanaanza taratibu za usajili kwa wataalamu wa wapya kuanzia taratibu za awali mpaka usahili kwa wataalami hao.

Naibu Waziri wa Ardhi Nyumba na Maendeleo ya Makazi Ridhiwani Kikwete akikabidhi vitendea kazi kwa mjumbe mpya wa Bodi ya usajili Wataalam wa Mipango Miji Bw. Goodluck Mighonu mara baada ya kuzindua bodi hiyo leo Jijini Dodoma.

Bodi hii ni ya tatu na iliteuliwa Disemba 2022 chini ya Mwenyekiti wake  TP. Prof. John Lupala.

WAMACHINGA,MAMA LISHE, WAFUGAJI,WAKULIMA,WAVUVI NA VIONGOZI WA DINI WAJENGEWA UELEWA KUHUSU BIMA YA AFYA KWA WOTE

Pichani: Katibu Mkuu Wizara ya  Afya Prof. Abel Makubi wakati akifungua kikao kazi cha kutoa Elimu ya Bima ya Afya kwa Wote kwa makundi mbalimbali jijiji Mwanza.

 Wamachinga,Mama Lishe ,Wafugaji, Wakulima , Wavuvi na Viongozi wa Dini jijini Mwanza wajengewa uelewa kuhusu Bima ya Afya kwa Wote

Kutoka Mwanza

Serikali kupitia Wizara ya Afya imewajengea uelewa kuhusu Bima ya Afya kwa wote viongozi wa  makundi ya Wamachinga, Wakulima, Wavuvi, Wachimba Madini, Bodaboda, Mama Lishe na Kamati ya Amani ya Mkoa wa Mwanza ili wakawe Mabalozi wa kutoa elimu ya Bima ya Afya kwa Wote katika jamii.

Kauli hiyo imetolewa na Katibu Mkuu Wizara ya Afya wakati akifungua kikao kazi cha kutoa Elimu ya Bima ya Afya kwa Wote kwa makundi mbalimbali jijiji Mwanza

"Sasa tunakuja na maboresho ya Bima ya Afya ambayo itakua ni Bima ya Afya kwa Wote, kila mtu kwa hali yake ya kiuchumi aingie kwenye mfumo wa Bima ya Afya hii". Amesema Prof. Makubi.

Ameeleza kuwa Muswada wa Bima ya Afya kwa Wote ukipitishwa utaongeza wigo wa wananchi wengi kujiunga katika mfumo wa Bima ya Afya  kutoka asilimia 15 ya sasa mpaka asilimia zaidi ya 90 na kuendelea ya Watanzania.

“Serikali  makini haiwezi kuacha makundi yote haya muhimu wabaki bila kuwa na uhakika wa matibabu ya afya zao.Hivyo lazima kuweka mpango wa Bima ya Afya kwa wote ambapo mtu akiugua kwa hali yoyote ya kifedha aliyonayo aweze kutibiwa kwa haraka na wakati ili aendelee na shughuli zake za utafutaji"Aliongeza Prof. Makubiu

UKISHINDWA KUSIMAMIA KUSOMA, KUANDIKA NA KUHESABU JITATHMINI HAUTOSHI - DKT. MSONDE

Pichani:Kaimu Katibu Mkuu Ofisi ya Rais Tawala za Mikoa na Serikali za Mitaa  anayeshughulikia Elimu Dkt. Charles Msonde.

Kutoka Dodoma

Kaimu Katibu Mkuu Ofisi ya Rais Tawala za Mikoa na Serikali za Mitaa  anayeshughulikia Elimu Dkt. Charles Msonde amewataka  viongozi  wanaosimamia elimu  katika Mamlaka za Mikoa na Serikali za Mitaa kujitathmini katika ufuatiliaji wa mwenendo wa elimu kwa watoto kwa kujua kusoma,kuandika na kuhesabu wanaomaliza elimu ya msingi.

Dkt. Msonde ameeleza hayo  tarehe 4 Januari, 2023  katika Kikao kazi cha Maafisa Elimu wa Mikoa, Wilaya, Taaluma na Watu Wazima kilichofanyika Dodoma.

Amesema kutokana  na tabia ya baadhi ya viongozi kusahau majukumu yao kwa kutowafuatilia walimu sehemu zao za kazi na kushindwa kufanya kazi kwa waledi, inapelekea kutokuwepo kwa ufanisi  katika kazi na matokeo yake kusababisha kutopatikana kwa elimu bora na watoto kumaliza elimu ya msingi kushindwa kusoma, kuhesabu na kuandika.

Aidha, amewataka viongozi hao kutokubali kukabidhiwa watoto kuanzia darasa la awali kutoka kwa wazazi/walezi na  kisha mtoto huyo  amalize darasa la saba kwa kutokujua kusoma, kuandika na kuhesabu (KKK).

“Hilo halitakubalika baadhi ya watu waharibu mipango na malengo ya Serikali, haiwezekani mtoto anamaliza darasa la saba hawezi kusoma, kuhesabu na kuandika ingelikuwa ni mtoto wako kama mzazi utajisikiaje kama kiongozi uliyepewa dhamana ikitokea hivyo maanake jitathmini hutoshi” amesisitiza Dkt. Msonde

Amewataka viongozi hao kutojikweza kwa uongozi na madaraka sababu sio lengo la Serikali bali lengo ni kwenda kushirikiana na walimu kwa kuwafuatilia na kujua changamoto kwa pamoja na kuzipatia ufumbuzi na sio kuwakatisha tamaa walimu.

Dkt. Msonde amemshukuru Rais wa Jamhuri ya Muungano wa Tanzania  Mhe. Samia Suluhu Hassan kwa kuendelea kujenga na kuboresha elimu nchini pamoja na kuboresha mazingira ya kujifunzia na kufundishia Januari, 2023 watoto wengi wataingia shule fedha zilizotolewa za ujenzi wa madarasa 8000 asilimia 96 yamekamilika tushirikiane na jamii ili  watoto hao waliochaguliwa waingie shuleni.

“Tuna walimu wazuri wakihamasishwa  kwa kupewa motisha, ari na hamasa ya kufanya kazi tutakuwa na taifa bora sababu wataalamu wetu wengi wanatokana  na walimu ” Dkt. Msonde

Kwa upande wake Katibu wa Tume ya Utumishi wa Walimu (TSC) Bi. Paulina Nkwama amewataka viongozi hao kusimamia misingi ya utumishi wa walimu katika kuwafuatilia maadili  na utekelezwaji wa majukumu yao ikiwemo suala la ufuatiliaji wa utoro wa walimu ambao unazorotesha elimu na kama walimu watakuwa vizuri kwa kutekeleza kwa ufanisi, waledi na ubunifu tutakuwa na watu wenye elimu bora nchini.

Naye Mkurugenzi wa Idara ya Usimamizi wa Elimu Ofisi ya Rais- TAMISEMI Bw. Vicent Kayombo ametoa rai kwa viongozi hao kwenda kuyasimamia  na kuyatekeleza maelekezo waliyopangiwa na viongozi hao sababu wameaminiwa na ni jukumu lao kusema wanaenda kuleta mabadiliko ya elimu kwa maslahi ya taifa.

Katika hatua nyingine, Dkt. Msonde amewataka viongozi hao kusimamia kwa kuwaandaa watoto kuanzia darasa la Awali  ili wanapofika darasa la nne na saba wafanye vizuri zaidi na sio kuwaacha mpaka wafike madarasa hayo ndio watumie nguvu kubwa.

POLISI WALAANI VITENDO VYA KIKATILI KWA WATOTO

Na Elizaberth Paulo,

Dodoma

Jeshi la Polisi mkoani Dodoma limetoa rai kwa wazazi na jamii kwa ujumla kuwalea watoto katika malezi mazuri na maadili mema ili kuwa na Viongozi wazuri wa Taifa hapo baadae.

Hayo yamejiri juzi katika kampeni ya TULE NA TUNYWE NA WAHITAJI iliyofanyika Chigongwe family lililoandaliwa na Manyunyu foundation ikihudhuriwa na wadau wengine wakiwemo Wawakilishi wa Jeshi la Polisi.

SP.Dkt.Ezekiel D.Kyogo Alisema Jeshi la Polisi linajenga uhusiano na jamii ndo maana wamefika Kusherehekea sikukuu ya mwaka mpya pamoja na watoto hao wenye uhitaji.

“Nitoe rai kwa wazazi kwamba wewe kama umekaa ukapanga kuona unamleta mtoto duniani basi uwe unawajibu wa kumuangalia, Yaani fikiri kuwa unamleta duniani na baadae unamwacha mtaani watu wengine wakulelee hiki ni kitendo kibaya kabisa”. Alitoa rai Kyogo

Alisema ili kutatua changamoto changamoto zinazojitokeza katika jamii zikiwemo za watoto wa mtaani au makundi mengine ya jamii lazima kuwepo na ushirikiano baina ya Polisi na jamii kwani Jeshi la Polisi haliwezi kutatua changamoto hizo pasipo ushirikiano na jamii.

Aidha alisema jeshi la polisi Linapobaini mzazi amemtelekeza mtoto mtaani kwa makusudi mpaka watu wa taasisi mbalimbali wamewachukua na kuwahifadhi lazima hatua kali Zitachukuliwa dhidi yake.

“Nitoe agizo lingine kwa wale kwa wale familia ambazo zinageuka kuwafanyia vitendo vya kikatili watoto ndani ya nyumba kiasi kwamba mtoto kwenye familia anaona hawezi kuishi anaona kero hivyo jamii ifumbue macho kwapamoja ukimuona mtoto wa jirani anafanyiwa vitendo viovu tutoe taarifa katika vituo vya polisi”Aliagiza 

ASP. Manase Dotto kamisheni ya polisi jamii makao makuu Dodoma Amewaasa watoto hao kuishi kwa kupemdana na kutoa taarifa kwa Viongozi wao pale Wanapoona wanatendewa vitendo viovu.

Akitoa neno la shukrani kwa niaba ya watoto wengine Paulo Charles Lusinde Alisema wanafarijika sana wanapotembelewa na kasema kituo kinawalea vizuri na kuwafunza kilimo mbalimbali hata ufugaji wa samaki na mafunzo mengine, Pia ameiomba Jeshi la polisi kuchukua hatua kwa wale wote wanaotekeleza vitendo viovu kwa watoto kwani wakati mwingine hata polisi wamekuwa wakiwapiga watoto wakiwa mitaani.

MABORESHO YA BANDARI KUONGEZA MAPATO YA SERIKALI

mwandishi wetu Irene Atibu

Kutoka Tanga...

 Maboresho ya Bandari ya  Tanga yanayofanywa na serikali  yanatarajiwa kuongeza uwezo wa Bandari ya Tanga kupokea mizigo kutoka Tangi 750,000 kwa mwaka hadi tani 3 milioni.

Kauli hiyo imetolewa na Meneja wa Bandari Masoud Mrisha wakati akizungumza na waandishi wa habari za uchumi na biashara wanawake.

alisema kutoka na maboresho hayo mapato ya serikali na ajira zimeanza kuongezeka.

Naye  meya wa Jiji la Tanga Abdulraman Shiloo alisema upanuzi huo pia unatarajia kuongeza  mapato kwa jiji la Tanga.

Amesema maboresho hayo yamesababisha kuongezeka kwa shehena za mizigo jambo lililochangia upatikanaji wa mapato ambayo sehemu ya mapato hayo yamewezesha upatikanaji fedha katika jiji.

" Tunashukuru maboresho haya yametupatia pesa ambayo ni sehemu ya asilimia kumi ya  mapato ya Halmashauri na pesa hiyo tumeikopesha kwa vikundi vya wanawake,vijana na watu wenye ulemavu.

Akizungumza na wanahabari hao mmoja wa wanufaika wa upanuzi wa mradi huo Bi Mwanaidi Salim amepongeza na kushukuru kwa kupata ajira ya muda katika mradi kwani umemuwezesha kujiongezea kipato katika familia  kwa kusaidiana na mwenzi wao katika kutekeleza majukumu  ya familia Kama kulipa Kodi na kununua mahitaji ya shule kwa watoto wake.

  Mwanaidi Salimu aliongezea kwa kusema dhana ya kwamba wanawake wa Tanga ni wavivu haipo tena kwani kwa Sasa wanawake wanafanya kazi.