SERIKALI AWAMU YA SITA IMEANZISHA MKAKATI MAHUSUSI

 

Pichani: Waziri wa Elimu, Sayansi na Teknolojia Prof. Adolf Mkenda

NA MWANDISHI WETU

SERIKALI ya awamu ya sita imeanzisha mkakati mahsusi wa kutambua na kuendeleza kazi za uandishi wa vitabu nchini kwa kuanzisha Tuzo maalum ya Uandishi Bunifu ili kuinua ari ya uandishi na usomaji vitabu.

Akimwakilisha Waziri Mkuu wa Jamhuri ya Muungano wa Tanzania katika uzinduzi wa kitabu  "Continuity with Vision: The roadmap to Success for President Samia Suluhu Hassan" Waziri wa Elimu, Sayansi na Teknolojia Prof. Adolf Mkenda amesema tuzo hizo zijulikanazo kama "Tuzo ya Mwalimu Nyerere" imeanza mwaka huu ambapo kwa kuanzia inahusisha  uandishi wa riwaya na mashairi.

Prof. Mkenda amesema katika mashindano hayo  mshindi wa tuzo hizo atapata zawadi ya fedha na kitabu atakachoandika  kitachapishwa na kusambazwa katika maktaba na maeneo mengine nchini.

Akizungumzia kitabu kilichozinduliwa "Continuity with Vision: The roadmap to Success for President Samia Suluhu Hassan" amepongeza Taasisi ESAURP kwa kuja na wazo la kuandika kitabu hicho na kwa kuhusisha  waandishi wanazuoni wengi ambao wameweza kuandika kwa umakini pamoja na mambo mengine maono ya Mhe. Rais juu ya mageuzi ya mfumo wa elimu kwa kufanya mapitio ya Sera ya Elimu na Mafunzo na mabadiliko ya Mitaala.

"Nimesoma kitabu hiki na

nimefurahi kuona ambavyo waandishi wametambua maono na kasi ya utendaji wa Rais wetu kama title ya kitabu inavyosema, lakini naamini kitakuwa pia chachu ya kuchochea kasi ya kutekeleza maono hayo na kuendelea kuletea taifa letu maendeleo".

Waziri Mkenda amesema kitabu hicho chenye sura zenye maudhui mbalimbali kuhusu maendeleo ya nchi kimeonesha bayana jinsi ambavyo  kazi kubwa inafanyika kimkakati katika Awamu ya Sita na kuongeza kuwa kitakuwa chachu ya kuchochea  maendeleo.

Kwa upande wake Mkuu wa Mkoa wa Dodoma  Rose Sinyamule  amesema amefurahi kushuhudia  uzinduzi wa kitabu hicho ambacho kimeandikwa na wasomi huku kikijibu maswali mengi yaliyokuwa yakiulizwa na watu wengi. 

"Nimejaribu kukisoma kitabu hiki  na kufuatilia maelezo kwa ujumla mnachojaribu kuonesha ni kuwa Wasomi wamesema ndio kwa Rais Samia," amesema Mkuu wa Mkoa wa Dodoma  Rose Sinyamule

Nae  Mkurugenzi Mtendaji wa ESAURP Ruta Mutakyawa amesema kitabu kilichozinduliwa kina jumla ya kurasa 624, Sura 29 na kimeandikwa na waandishi  45 kutoka  Vyuo mbalibali hapa nchini ikiwemo Chuo Kikuu cha Dar es Salaam (UDSM) Chuo Kikuu Dodoma (UDOM), Chuo cha Usimamizi wa Fedha (IFM) 

Akielezea kwa ufupi kuhusu kitabu hicho Mhariri Mkuu Profesa Ted Maliyamkono amesema kitabu hicho kimeandikwa ili kuonesha namna Rais anavyotekeleza kwa vitendo maono yake na kuendeleza ya kiongozi aliyemtangulia.

Mwisho